У Беларусі з 31 ліпеня падаражэе праезд цягнікамі

Цэны вырастуць на 5–15%, вынікае з паведамленьня БЕЛТА.

Гарадзкія лініі стануць даражэйшыя:

• на 20 капеек у межах аднаго тарыфнага поясу (напрыклад, Менск – Гарадзішча),
• на 25 капеек у межах двух паясоў (напрыклад, Менск – Чырвоны Сьцяг).

На рэгіянальных і міжрэгіянальных лініях рост цаны залежыць ад адлегласьці, тыпу вагона і клясы. Напрыклад:

• Менск – Рудзенск (рэгіянальны, эканом-кляса) — на 25 капеек,
• Менск – Бабруйск (рэгіянальны, бізнэс-кляса) — на 55 капеек,
• Менск – Віцебск (пляцкарта) — на 82 капейкі, (купэ) — на 1,13 руб.,
• Менск – Гомель (бізнэс, 2-я кляса) — на 1,20 руб., (1-я кляса) — на 1,65 руб.

Папярэдняе павышэньне тарыфаў было летась у красавіку.

Новыя тарыфы ўступяць у сілу пасьля афіцыйнага апублікаваньня пастановы № 50, якую ўжо прыняло Міністэрства антыманапольнага рэгуляваньня і гандлю.

Як вынікае з інфармацыі на партале pravo.by, гэта адбудзецца ўжо 31 ліпеня, у чацьвер.